Davao City – Gilauman na daan sa Agusan del Norte Advocators for Clean Election (ADACE) nga gubot gihapon ang piniliay sa Barangay ug Sangguniang Kabataan karong Mayo 14.
Gi-ikspektar na daan sa ADACE ang pagnilabayay og lapok sa magkontra nga kandidato sa siyam ka adlaw nga kampanya sugod karong adlawa.
Walay kalainan ang national ug local election sa barangay ug SK election busa wala gihapoy lauman nga kalinaw sa bugnong lugaynon sanglit mao na kini ang riyalidad sa atong nasud.
Magmalinawon man unta ang piniliay kun non-partisan lang unta ang barangay ug sk election apan ang problema kay naglabot-labot ang dagkong politiko, suma ni Convenor Edgar Palarca Jr.
Ampay matud pa sa mga kandidato ang pagbuhi og pila milyones ka pesos aron gamiton sa pagpalit og boto aron maseguro ang kadaugan sa Mayo 14 eleksyon.
Gumikan sa kalisod daghan sa mga botante mapugos og baligya sa ilang mga boto sa mga kandidato ug sagad mahitabo kini sa katapusan nga mga oras sa kampanya pinaagi sa pagkamang sa mga botante.
Ug lauman usab nga dili musanong sa mga balaod sa COMELEC ang mga kandidato kansang gisuportahan sa mga political party.
Nagpabilin gihapon nga dili matured ang mga botante hangtud karon kay bisan og eksperyensado na sa piniliay daghan ra gihapon masilaw sa tagingting nga sapi sa mga kandidato ug dayon ibaligya ang ilang boto.
Hinoon duna nay dyutay nga kalainan ang eleksyon sa barangay ug sk karon ikumpara sa nangligad nga panahon, dugang sa Agusan Del Norte Advocators for Clean Election Convenor.
RadyoMaN Joel Viray
