Davao City – Adunay ni-uyon karon sa ideya nga i-oktaba lamang usa nato ang Oktubre 23, 2017 grassroots election apan dili ikalalis nga aduna usay hugot nagtoo nga mas maka-benepisyo kanato nga ipursige kini subay sa orihinal nga gikatakda sa balaud.
Sa nangharos nga morning primetime radio social commentary program ‘Straight to the Point’ sa RMN DXDC Davao, nagkabahin-bahin ang opinyon sa tawo diin kadtong buot nga hunongon ang eleksyon sa barangay ug Sangguniang Kabataan (SK) kumbinsido nga gastoso lamang kini nga ehersisyo-pulitikal gawas pa sa posibilidad nga modula ang drug money panahon sa eleksyon.
Una niini, nagbahad si pamuno-nasud Rodrigo Duterte nga adunay posibilidad makalingkod sa pangatungdanan ang 40% sa mga incumbent barangay officials kinsa na-involve sa droga.
Sugyot karon sa House of Representatives nga i-uswag ang eleksyon karong Mayo 2018 dungan sa posibleng referendum alang sa Bangsamoro Basic Law kun BBL.
Mientras kadtong buot nga ihinayon kini nagtoo nga angay lang hatagan ug oportunidad ang katawhan nga sipa-on sa pwesto ug pulihan na ensigida kadtong mga dili produktibo ug korap nga mga barangay ug SK officials pinaagi sa balota.
Sa pikas bahin, giklaro mismo ni Commission on Election (COMELEC) Chairman Andres Bautista nga padayun lamang sila sa pagpreparar gani gikatakda karong adlawa Huwebes ang pagsugod sa imprenta sa mga balota sarang magamit karong Oktubre.
Sa hisgotanang scenarios nga malagmit matigayon sa unahan, gisugyot ni Bautista nga mas maayong hulaton na lamang nato kun unsang mekanismo ipatuman kun maaprobahan na ang poll resetting, kalakip ang isyung katudloan sa mga officers-in-charge o ang pag-instalar sa mga incumbents nga magpabilin ubos sa ‘holdover capacity.’
Dugang sa hepe sa poll body nga karong Agosto 15, 2017 usa ka public hearing ug consultation ilusad dinhi sa Davao City haron masayran kun unsa ang sentimyento sa katawhan sa nagsingabot nga piniliay.
Sa pikas bahin, nagtoo si Department of Interior and Local Government (DILG-XI) Regional Director Alex Roldan nga mas maayo kun mahinayon ang eleksyon sanglit ‘overstaying’ na kaayo ang mga naghupot sa barangay leadership karon gani may mga higayun pa nga kawsa kini sa bangi ug tensyon diha sa kabarangayan.
Nagtoo usab ang hepe-rehiyunal sa DILG nga adunay kritikal nga mga pangutanang angay resolbahon sa mga tigpanday sa balaud pananglitan unsay sistema nga ipatuman dinhi sa habagatan konsiderahon nga ubos kita sa pinasahi nga setup diin adunay martial law nga gipatuman karon dinhi.
Dugang ni Roldan nga anaa gayud sa tawo ang pinal nga katungod sa pagpili sa kun kinsa ang mas angayan nga mangulo sa kabarangayan ilabi na nga nasayud ang tawo kun kinsa kadtong notoryus nga mga kadagkuan sa ilang mga dapit kinsa nagdula sa droga busa angayan na gayud nga hulipan sa lingkuranan.
Kasamang June Duterte
