Barbero nadakpan pagpayuhot sa illegal nga droga

Gibalhog karon sa bilangguan ang usa ka barber human nga nadakpan pagpayuhot sa illegal nga droga atol sa drug buy-bust operation nga gipahigayon sa mga kapulisan pasado alas 4:41 sa hapon adtong Domingo didto sa Purok-Upper-Pol oton, Barangay Tankulan, Manolo Fortich, Bukidnon.

Giila ang suspek nga si Eric Cuñado, 45 anyos, minyo, barber, ug residente sa Purok-1, Barangay Poblacion, Manolo Fortich, Bukidnon.

Napalit sa poseur-buyer ngadto sa suspek ang usa ka pakete sa gituohang drogang shabu nga mukantidad og P1,000.00 ug gibana-bana nga mutimbang og 0.06 gramos.

Samtang pagsusi pa sa kapulisan, dugang nakompiska ang upat ka mga pakete sa maong drogang shabu nga mutimbang og 0.43 gramos ug gibana-banang anaa sa P2,924.00 ang kantidad niini.

Narekober usab ang P1,000 bill nga buy-bust money.

Gidala sa Manolo Fortich Municipal Police Station ang dinakpang suspetsado lakip ang mga nakompiskang ebidensya nga iturn-over ngadto sa Regional Forensic Unit, Cagayan De Oro City alang sa eksiminasyon.

Kasong paglapas sa RA 9165 kon Comprehensive Dangerous Drugs Act of 2002 ang atubangon sa dinakpang suspetsado.