Davao City – Gikalipay sa mga Davaoeños ang pagtanggal sa mandatory nga paggamit sa motorcycle barriers ingon man barriers sa public utility vehicles (PUVs) dinhi sa syudad sa Davao.
Sa Executive Order (EO) No. 63 nga gipagula sa City Government of Davao kagahapong adlawa (November 2, 2021), effective immediately ang maong direktiba.
Usa si Rubelyn Booc sa mga netizens nga nalipay ug nagpasalamat sa lifting sa paggamit og barriers diin nanghinaut usab siya nga mabalik ang pamasahe kaniadto human nga nagbaton og usbaw niini tungod sa gamay nga ihap sa pasahero nga masulod sa sakyanan ilabi na sa public utility jeepneys (PUJs).
“Goodbye barrier naman sir noh unta ang pamasahe sad sir mubalik nas dati kay dikit-dikit naman tao sa jeep ana. Unta mabalik na sa dati na ang pamasahe, sa Panabo to Bunawan kay P12 ra .Maka tipid nami [sir],” komento niini sa post sa DXDC 621 RMN Davao Facebook page.
Apan, ilawom sa direktiba, mandatory gihapon ang pagpatuman sa physical distancing ug pagsuot og face mask sa riding public.
Bisan pa man, mamahimo gihapon nga mugamit og barrier ang PUVs ug mga motorsiklo apan boluntaryo na lamang.
Kahinumduman nga sa milabay nga tuig, gipatuman ang mandatory nga paggamit sa barrier sa syudad isip usa sa mga measures batok Coronavirus Disease 2019 (COVID-19).
RadyoMaN Kirby Manzon
