Laing pulis ang gipusil patay sa Sitio Malbog, Brgy. Poblacion,Alegria Cebu kagabii.
Si PO3 Jonathan Yaun Tilos, 36 anyos, nadistino sa Ginatilan Police Station, gipusil sa wala pa mailhing mamumuno human gyud sa workout niini sa usa ka fitness gym sa lungsod sa Alegria , alas 8:05 kagabii.
Basi sa imbistigasyon sa kapolisan sa Alegria, si PO3 Tilos giingong dunay gikalalis sa wala pa kini muadto sa fitness gym alang sa iyang workout, apan human sa workout sa biktima samtang kini paingun nang mosakay sa iyang sakyanan nga Toyota Hilux, gipusil kini sa makadaghang higayon.
Ang gunman dali nga mipalayo sakay sa itom nga sakyanan human sa pagpamusil.
Gidala pa sa Reinhard Wirtgen Hospital sa Alegria si PO3 Tilos apan , ang attending physician nga si Dr. Gilberto Magallon,nideklarar sa biktima nga dead on arrival sa hospital.
Si PO3 Tilos maoy ikaduhang pulis nga gipusil patay karong semanaha. Kahinumduman nga niadtong Domingo sa gabii Hunyo 10, patay usab si Police Senior Inspector Raymond Hortezuela nga nadistino na sa Negros Oriental Police Office ,atol sa buybust operation sa mga operatiba sa PNP Counter Intelligence Task Force sa Brgy. Tipolo Mandaue City,Cebu.
