Roxas City, Capiz – Ginsuguran na sang mga katapo sang Barangay Council sang Baybay, Roxas City ang isa ka inisyatibo agud nga mapabilin matinlo kag malikawan ang basura sa mga kiliron sang baybayon. Sa nasambit nga programa, ginaganyat ang mga pomuluyo sang Barangay Baybay nga magpamulot sang basura sa ila palibot kag ang masupot nga basura pagabayluhan sang sardinas. Ang tagsa ka isa ka sako nga basura nga mapulot sang mga residente, pagabayluhan sang apat ka lata nga sardinas.
Ginpahayag ni Punong Barangay Reynaldo Magallanes nga nakita ni anay DILG Secretary Mar Roxas ang mga nagalapta nga basura sa Baybay beach nga nangin rason sang pagkadismaya sini bangud mahigko ang isa sa mga ginapabugal nga tourist destination sang syudad sang Roxas.
Suno kay Magallanes, nagpasalig nga magahatag sang bulig si anay DILG Secretary Mar Roxas kag City Mayor Angel Alan Celino sa barangay agud matigayon ang nasambit nga programa. Duha ka lata nga sardinas ang magagikan kay Roxas, tig isa ka lata ang ihatag sang syudad kag sang barangay.
Ginpahayag dugang ni Magallanes nga may yara na sang 10 ka karton sang sardinas sa ila barangay kag mahimo na ini nga mahatag sa mga residente kun makapulot kag makadala ang mga ini sang isa ka sako nga basura.
