Davao City – Aduna na’y gihimong lakang ang lokal nga kagamhanan aron mahatagan og hinanali nga kasulbaran ang sitwasyon sa New Carmen Sanitary Landfill nga sa dili madugay mapuno na sa tone-toneladang basura sa atong dakbayan.
Matud ni Sangguniang Panglungsod (SP) Committee on Health Chairman Councilor Joselle Villafuerte, si Mayor Inday Sarah Duterte-Carpio na mismo ang milihok ug miadto sa Japan aron tun-an ang ilang teknolohiya nga magsulbad sa basura sa dakbayan.
Sumala ni Villafuerte, ang makutlo nga mga pagtulun-an gikan sa maong teknolohiya maoy gamiton sa paghuman sa suliran sa basura sa siyudad nga gimulo sa katawhan tungod sa kadaghan nang basura nato karon.
Usa sa gikunsidera mao ang ‘waste-to-energy technology’ nga gigamit sa ubang nasud nga dakung tabang sa pagtuldok sa problema sa basura ug gawas niana madugangan pa gyod ang enerhiya sa dakbayan.
Gibutyag usab ni Villafuerte nga kulang na gayod ang New Carmen Tugbok sanitary landfill ug nagkinahanglan na og dugang luna alang sa labayanan og basura sa tibuok dabayan.
Naglaraw si Villafuerte nga iyang ipatawag ang mga opisyal sa CENRO aron pangayoon ang eksplinasyon kung nganong dili untop ang ilang pagpangolekta sa mga basura.
Lakip usab subayon ni Villafuerte ang gidaghanon sa garbage trucks ug trash bins aron matumbok ang rason kung nganong langay man kaayo ang pagkarga sa mga basura niining ulahing mga adlaw.
RadyoMaN Joel Viray
