BACOLOD CITY – Hugot nga ginapanginwala sang nadakpan nga anak sang anay barangay kagawad nga iya ang shabu nga nakuha sa buy bust operation nga ginpatigayon kahapon sang hapon sa Purok Arao, Brgy. Vista Alegre, Bacolod City.
Suno sa nadakpan nga si George Michael Adeva, 29 anyos ang edad, residente sang Brgy. 30 kag temporaryo nga naga-istar sa Block 8, Purok Arao, Vista Alegre nga nakibot na lamang siya sang ginsulod sang mga pulis ang iya balay pasado las 4 kahapon sang hapon.
Siling ni Adeva, indi iya ang shabu nga nakuha kon diin ginhimuan gid lamang siya sang sala bangud nakahibalo ang mga nagdakup sa iya kon kay sin-o ang ato nga mga shabu.
Ang buy bust ginpatigayon sang mga element sang City Drugs Enforcement Unit sang Bacolod City Police Office sa pagpamuno sang Assistant Team Leader sini nga si P/Insp. Adrian James Albaytar.
Ginaduso sang suspek nga indi ensakto ang pagdakup sa iya gani nagahingyo ini sang hustisya kag nagalaum nga indi siya masentensyahan sang life imprisonment.
Angut sini, ginpahayag ni Albaytar nga si Adeva ang miembro sang isa ka dako nga drug group sa Bacolod apang ginakabig ini nga newly identified drug personality.
Narecover sa suspek ang 4 ka dalagku nga sachet sang suspected shabu nga may market value nga kapin P225 mil pesos./dyHB BACOLOD
