General Santos City—samad sa liog ang naangkon sa 19 anyos nga batan-on human gidunggab sa miyembro sa Children in Conflict With the Law (CICL) o mas nailhan sa tawag nga “Batang Sukarap ” sa may Prk. Uhaw, Barangay Fatima ning syudad.
Ang biktima nailhang si Rogelio Cuento, 19, residenti sa Block 17, Barangay Fatima, Gensan.
Alas 10:45 ang takna sa gabie, July 25, 2017 nag baktas sa kalsada sa dalang Prk. Uhaw, ang nahisgutang biktima padulong sa ilang panimalay dihang siya giatngan sa grupo sa mga Sukarap.
Mikaritil kinig dagan aron makalikay sa kagubot apan siya gigukod sa mga nahisgutan hangtud nga nakorner sa mga suspetsado.
Didto naa kini gidunggab, usa ka higayon igo sa iyang liog. Nag iyahay usab ug dagan ang mga suspek human sa pagpanunggab samtang ang biktima gitabangan sa mga residenti sa lugar aron nga madala sa St. Elizabeth Hospital aron mapailawom sa medikasyon.
Sa karon nagpahigayon nag makuting imbistigasyon ang Police Station 7, aron nga mailhan ang mga suspek sa krimen.
Samtang ila usab ginasuta kung duna bay atraso ang biktima batok sa mga nahisgutan o igo ra gyud kini nga natripan sa mga suspetsado.
