Davao City – Misuway og pagkutlo sa kinabuhi ang usa ka ulitawo human nga gipasakitan kini sa iyang hinigugma pinaagi sa paglaslas sa tiyan nga nahitabo sa Garnet St., Matina, ning siyudad sa Dabaw pasado alas-2:00 sa kahaponon.
Apan maayo na lamang kay nasalbar pa sa medical staff sa Southern Philippines Medical Center (SPMC) ang biktima nga gi-ilang si alyas Noriel, 21 anyos, ug lumad nga taga-Malita, Davao Occidental, human nga gidala kini sa higala niini.
Matud sa nagdala nga samtang nag-inum sila sulod sa balay sa Matina misulod matud pa si Noriel sa comfort room ug dugay kini nakagawas.
Human sa pila ka minuto migula ang biktima nga nagkadugo na og adunay nilaslasan na ang tiyan ani.
Abtik nakasapupo ang higala sa biktima paingon sa ospital diin gituohoan nga gipasakitan kining biktima sa iyang hinigugma sa wala pa matino nga hinungdan.
RadyoMaN Joel Viray
