Batan-on naghikog-patay

200

Davao City – Wala na maabti nga buhi sa usa ka amahan ug patay na nga iyang naabtan ang iyang anak pinaagi sa paghikog sulod sa ilang balay sa may Panacan Relocation kagahapon sa udto.

Igo na lang gibadbaran sa pisi sa amahan nga si alyas ‘Dionesio’ ang iyang anak nga si alyas ‘Danielle’, 18 anyos, estudyante, human naghikog kini sa ikaduhang andana sa ilang balay kagahapong adlawa.

Daling nangayo og tabang sa Medic Team sa Central 911 ang amahan sa pamasin maluwas pa ang iyang anak apan gideklara gihapon kini nga patay na human sa pila ka oras nga nagbigti kini.

Matud sa nagbangutan nga amahan nga samtang padulong siya sa trabahoan gipasa kaniya ang suicide text sa anak gikan sa higala sa biktima alas-12:30 sa udto kagahapong adlawa.

Tungod ani, paspas nakabalik sa pinuy-anan ang amahan aron susihon ang kahimtang sa iyang anak apan iya nalang naabtan ang nagbitay nga anak ug wala nay kinabuhi.

Giingon ni PO3 Joevan Mangaron sa Homicide and Arson Section sa Sasa PNP nga gitala sa biktima ang nylon color green sa bakal nga hagdanan sa ikatulong andana sa ilang balay kung nakaplagang nagbitay ang dalaga.

Nagtoo si alyas Dionesio nga wala makaya sa iyang anak ang kanunay panag-away sa iyang misis ug mas nabug-atan ang biktima dihang hingpit mibiya ang inahan.

Gikatakda ipailawom sa otopsiya ang patay’ng lawas sa biktima nga gidala na karon sa Rivera Funeral Homes aron madeterminar gayod sa mga imbestigador ang dugang hinungdan sa kamatayon sa dalaga.

Ania ang unod sa suicide text message ni alyas Danielle: “KAPOY NA JUD KO, BYE NA ANG ALL and AKO YUNG TIPONG PINAPABAYAAN NALANG KAHIT NASASAKTAN.”

Subay niini, sa gipaambit nga latest research data and inputs ni Ms. Ermela Deposa, Program Director for Counseling sa Koinonia Theological Seminary Foundation denhe sa Davao City atol sa ‘Understanding Depression Session’ sa RMN DXDC Davao, sumala niya nga importante kaayo ang papel sa pamilya diha sa pag-ila, pag-atendir ug pag-atiman sa nasinatiang depression karon sa katawhan diin ang ubang insidente mosangpot gayud sa pagtubok kun paghikog sa mga nawad-an na’g paglaum.

Gisaysay ni Deposa nga komon kaayo karon ang kakulang sa paglaum kun ‘sense of hopelessness’ sa tawo inubanan sa daghang mga factors nga nagatunol kaniya ug mga suliran gani ug dunay mga nailhan nga nakasinati ig depression, hatagan kini og atensyon ug dili ibalewala lang pinaagi sa mga counseling.

RadyoMaN Joel Viray

Facebook Comments