Sa interbyu sa DXDC RMN Davao kang Police Major Butch Kevin Rapiz, Chief of Police sa Lupon Municipal Police Station, giila niini ang biktima nga si Richmond Alferes, 21 anyos, ulitawo, labor ug residente sa Purok Don Juan Quinoñes, Barangay Poblacion.
Subay sa imbestigasyon, sa dihang naglingkod-lingkod ang biktima likod sa tricycle, kalit na lang nga giduol ang biktima sa duha ka mga ka wala mailhing suspek dayon siya gipusil sa makadaghang higayon gamit ang gituohang .45 nga pistola.
Sa pagpanubay sa kapulisan, gibutyag sa amahan sa biktima nga adunay daghang nasuko sa iyahang anak, diin nasayrang miyembro kini sa usa ka gang sa lugar.
“Maliban sa iyahang nakalaban sa iyahang gang (ug) mga nakalaban pud nga batan-on, naa pud daw syay mga gipanghilabtan nga balay. Actually, last three weeks ago, mura’g gi-report na sya diri nga nakita sya sa CCTV (closed-circuit television) snga nanglungkab og balay,” saysay sa pulis.
Padayon pa karong gipalawman sa awtoridad ang imbestigasyon ug ang paggukod sa mga suspek sa krimen.
RadyoMaN Kirby Manzon
