Davao City – Aron mawala ang pagduda sa katawhan nga pulis ra ang riding in tandem ug naghimo sa extra judicial killings, gikinahanglan pamatud-an kini sa nasudnong kapulisan pinaagi sa paggukod sa mga suspek.
Kini ang hagit ni Citizen Against Crime Poverty and Corruption National Chairman Dr. Paul Noel Tacorda kang PNP Director General Ronald “Bato” Dela Rosa kinsa buot papahawaon sa puwesto sa mga kritiko.
Aron makumbinsir ang publiko nga walay kalabotan sa EJK ang mga pulis angay ipakita ni Dela Rosa ang paglutos sa riding in tandem nga gapamusil sa mga drug pushers ug mga inosinte,sigun ni Dr.Tacorda.
Pero gitataw ni Dr. Tacorda nga dili kini mutuo nga dunay EJK ug Riding in Tandem naglihukan subay sa kampanya kontra droga gawas kun adunay lig-on nga mga ibidinsiya nga magsuporta sa alegasyon batok sa PNP.
Masabtan sa pamahayag ni Dr. Tacorda nga daw dili kini uyon nga ipasangil sa gobyerno ug kapulisan ang paglikida sa mga nagdula og droga kay may posibilidad nga ang mga sindikato misakay sa drug war aron hugawan ang imahe sa kapulisan.
Sa nasangpit nga punto de vista, dili makatarunganon nga hinginlan si Bato gumikan lamang sa akusas-yon sa mga kritiko nga estado ug kapulisan ang nagpaluyo sa riding in tandem ug sa EJK bisan og walay igong basehan.
RadyoMan Joel Viray
