Davao City – Bayanihan ang nahimong hinagiban sa Barangay 9-A aron mapunggan ang pagkanat sa sakit nga dengue ug leptospirosis nga hinungdan sa kamatayon sa mga nahimong biktima niining mga balatian.
Mao kini ang gigamit nga hinagiban sa mga residente sa Barangay 9-A aron dili sila mag kasakit sa leptospirosis nga gikan sa ihi sa ilaga ug sa baboy ug dengue nga gikan sa lamok.
Ang ihi sa ilaga ug sa baboy maoy tinubdan sa sakit nga leptospirosis diin ang kagaw ani musagol sa tubig baha ug puwede sab kini makuha pinaagi sa pisik sa parte sa lawas nga dunay bangag.
Matud ni Kapitan Tata Llubit, duha ka purok sa iyang barangay gitutokan sa kampanya gumikan taas ang posibilidad sa pagkanat sa leptospirosis ug dengue tungod kay bahaon ang maong mga dapit.
Giingon ni Llubit, ang pagpahigayon og bayanihan usa lang sa ilang mga programa nga may kalabutan sa pagbuntog sa nasangpit nga mga balatian.
Gikinahanglan ang paglambigit sa katawhan aron makab-ot ang zero leptospirosis ug dengue cases nga gipaningkamotan sa mga barangay opisyal, dugang sa Kapitan.
RadyoMaN Joel Viray
