Nagakadapat nga may determinsayon kag magsalig gid sa Ginuo agud malab-ot ang kadalag-an.
Ini ang pahayag ni Alexie Mae Caimoso, ang beauty queen – athlete nga nakakuha sang gold medal sa Palarong Pambansa 2018 kag nagbreak sang kaugalingon nga record sa high jump.
Suno kay Caimoso , mahilig na siya mag-intra sa beauty pageant kag modelling halin pa sang una kag nagsugod naman ang iya pagkahilig sa sports sadtong Grade 4 siya nga iya gid gindevelop tubtob nangin maayo nga atleta.
Dugang pa ni Caimoso nga makapila naman siya mapaslawan sa high jump apang wala gid nadula ang kagustuhan nga makakuha sang gold medal bangud para sa iya, kon masarangan sang iban, masarangan man niya.
Ginpahayag ni Caimoso nga matapos napaslawan, iya ginhibalo kon ano pa ang kulang, nagtraining sang husto kag nagsalig sa Ginuo tubtob nakuha ang gold medal sa Palarong Pambansa 2017 kag liwat nga nagkampeon sa Palarong Pambansa 2018 sa diin iya pa nabreak ang record sa high jump nga 1.65 meters matapos nakabalhag sang 1.68 meters .
Suno kay Caimoso insipirasyon niya ang iya pamilya kag ini ang iya pamaagi agud makita ang amay nga wala pa niya makita kag makilala tubtob subong.
Nahibaluan nga may mga universities na sa Manila pati na sa US nga nag-offer sang scholarship kay Caimoso.
Suno kay Caimoso, magapadayon ang iya karera sa modelling kag magahanas man siya sa hinampang.
Si Alexie Mae Caimoso ang nagataas sang 5’8” kag nagapang-edaron sang 17 anyos, tumandok sang Leon, Iloilo kag naga-eskwela sa Iloilo National High School.
ctto
