Davao City – Sa unang tulo ka tuig, nagpabilin sa gihapong hataas ang rating ni Pres. Rodrigo Duterte kung itandi sa mga nanglabay’ng mga pangulo sa nasud.
Sumala ni Ateneo De Davao University (ADDU) Political Science Prof. Ramon Beleno III, in a scale of 1 to 10, seven ang gihatag niya nga grado sa presidente sa iyang mga nahimo base sa iyang mga gisaad sa katawhan niadtong panahon sa kampanya.
Matud ni Beleno, samtang nagtrabaho ang pangulo sa iyang gimbuhaton, nagkadaghan usab ang mga tawo’ng iyang nahimong kaaway tungod sa kakulang nga pagsabot sa iyang ginahimo.
Segun ni Beleno, gikinahanglan dinhi nga mas transparent ang gobyerno sa ilang ginahimo aron makita sa iyang mga kritiko nga adunay ginabuhat ang kagamhanan.
Gitataw usab ni Beleno nga wala pa hingpit milampos ang war on drugs campaign tungod kay anaa gihapon ang droga tungod sa kadako sa problema, apan sa mga proyekto ilawom sa ‘Build Build Build’ Program inanay na nga nagkadaghan ang mga obras-publikas.
Nahimong paspas usab ang pagtubag sa problema sa bugas pinaagi sa Rice Tariffication Law, free tuition, Mental Health ug uban pang mga priority programs sa administration.
Sugyot ni Beleno nga hatagan usab ug igong pagtagad sa gobyerno ang mga international affairs sama sa problema sa West Philippine Sea ug International Criminal Court (ICC) inay mga tutukan lamang ang mga lokal kun domestic problems.
RadyoMaN Bernard Pantallon
