Davao City – Giklaro karon ni Ateneo de Davao University (ADDU) academician Prof. Ramon Beleno III nga ang isyung posibleng term extension ni Pres. Rodrigo Duterte angay masabtan sa tanan sa konteksto sa pederalismo.
Sa programang ‘Straight to the Point,’ gisugilon ni Beleno nga nisibaw ang maong senaryo karon sa dihang nagka-anam na kaduol ang higayon diin hukman sa katawhan kun tugtan ba niini ang pag-usab sa presenteng porma sa panggobyerno gikan sa bicameral-presidential ngadto sa federal-presidential or parliamentary system.
Matud sa political science professor, angay masabtan nga ang pabor sa maong senaryo nagtoo lamang nga angayan hatagan ug bag-ong mandato ang lider sa nasud apan hugot usab kining gibabagan niadtong nagtoo nga dili makaayo sa atong nasudnong demokrasya ang pag-limite sa tsansang mangalagad sa usa lamang ka tawo kun personalidad nga popular ug pamoso.
Kagahapon, hugot giluwatan sa palasyo sa Malacañang nga mismong si Duterte dili uyon sa konseptong siya maoy mangulo sa usaka Transition Government una pa ang full federated governmental setup gani nisaad kini nga mokanaug gilayon sa powesto bisan kun wala pa mahuman ang iyang temino kun maplastar na sa nasud ang bag-ong porma sa panggobyerno.
Sa pikas bahin, gitataw ni Beleno nga adunay pupaigong merito ang gikasugyot nga mandatory drug test alang sa tanang mga elected officials kun kadtong naghupot ug elective positions.
Hinoon, iyang gitino nga ang maong sugyot malagmit maka-bayolar sa katungod sa mga piniling opisyales apan walay dautan kun sila mopailawom niini aron magpamatuod ngadto sa katawhan or mga botante nga wala silay kalambigitan diha sa illegal drugs.
Gidasonan usab ni Beleno ang ideya nga mas maayong himoon na lamang nga rekwisito diha sa pag-file sa Certificate of Candidacy (CoC) ang drug test aron mamahimong basihan sa kaligdong ug katakos sa usaka political aspirant.
RadyoMaN June Duterte
