Namatay na ang beteranong aktor na si Domingo “Menggie” Cobarrubias, Huwebes ng umaga, dahil sa pneumonia complications. Siya ay 68-taong-gulang.
Kinumpirma ng misis niyang si Gina ang malungkot na balita sa pamamagitan ng social media.
“Goodbye my love. Thank you for the 30 wonderful years. I love you. Dear God please give me the strength to be able to face this very difficult moment of my life,” saad ng maybahay sa kaniyang Facebook.
Dakong alas-8:20 ng umaga nang pumanaw si Cobarrubias habang nakaratay sa Asian Hospital and Medical Center sa Alabang, Muntinlupa City.
Ayon naman sa anak niyang si Gino, hanggang ngayon ay hinihintay nila ang resulta ng COVID-19 test ng yumaong ama.
Isang araw bago bawian ng buhay, nakapag-post pa ang batikang aktor ng salitang “Good bye” sa kaniyang Facebook.
Labis ang pasasalamat ng naulilang pamilya sa mga nakikiramay at nagpaparamdam ng pagmamahal kay Cobarrubias.
Huling napanood ang namayapang artista sa Kapamilya soap opera na “Make It With You”.
Naging bahagi rin siya ng mga teleseryeng “Beautiful Justice”, “The Killer Bride” at “Wagas”.
Namalas din ang husay sa pagganap ni Cobbarubias mga pelikulang “Sakada” (1976); “Jaguar” (1979); “Angela Markado” (1980); “Mga Uod at Rosas” (1982); “Soltero” (1984); “Orapronobis” (1989); “Sabado Nights” (1996); “Hiling” (1997); “Deathrow” (2000); “Mano Po” (2002), “Eerie” (2018); at “Signal Rock” (2018).
Sa tatlong dekada ng beteranong aktor sa showbiz, nanalo siya bilang 2014 Best Actor sa QCinema International Film Festival para sa indie film na “Mauban: Ang Resiko”, at 1980 Gawad Urian Best Supporting Actor para naman sa pelikulang “Jaguar”.
