Davao City – Pareho nga sa masakit nga trahedya namatay ang mga kapikas sa kinabuhi nila ni Dennis Larida ug Chad Daluro.
Bisan pa man sa mapait nilang kasinatian nga nag-usab sa dagan sa ilang kinabuhi pareho silang nibarog ug nagpadayon sa pagtikang ngadto sa unahan nga puno sa pagsalig sa kahitas-an nga aduna gihapoy paglaom bisan pa man sa mapait nilang naagian, ang pagkahanaw sa hingpit sa ilang mga minahal sa kinabuhi.
Usa si Dennis Larida sa mga survivors sa September 2, 2016 Roxas Night Market Bombing incident diin ang iyang mag-inahan nga si Melanie Faith ug anak nga si Deniel Josh kinsa kauban niini sa massage area niadtong gabhiona parehong nakabsan sa kinabuhi gumikan sa kalit nga pagbusikad sa bomba nga gitanom sa usaka tampalasan nga terorista.
Gihinumdum ni Larida ang oras nga nibiya na ang iyahang asawa ug anak sulod sa Trauma Section sa Southern Philippines Medical Center.
“Kanang time bya with the family na-short ko ana, very short bya ko sa time nako sa akoang pamilya kay nagsige gyod kog paningkamot nga mabuhi sila kung ikumpara nako ako ug akong asawa ug sa akoang anak mas daghan sila og panaguban kay mabilin silang duha kay ako magsige man ko og byahe,”
“Dili gyod easy ang experience nga makita nimo imong anak ug asawa kanang dying na gani mura’g kandila ba nga nagkaanam na og ubos ang ilang pagginhawa,”
Gitugyan usab niini ang tanan ngadto sa Ginoo ang iyang mga kalibog ug mga pangutana sa masakit nga trahedya.
“Dili pod bya easy nga magingon ka nga mag-move on dili na siya easy. Pinaagi gayod sa grasya sa Ginoo ug daghang mga tao nga naga-pray sa ako nga makarecover,”
Una pa man ang Kalagkalag, nibisita na og sayo si Dennis sa lubnganan sa iyang pinangga nga mag-inahan didto sa Calinan Memorial Park dungan usab sa pagsaulog sa ika 45 anyos nga birthday na unta sa iyang asawa niadtong Oktobre 27.
Matud ni Dennis nga lumalabay ra ang tanan niining kalibutan ug angay nga andam kita kay walay nakahibalo kung kanus-a ang usa ka tao mupanaw.
Taliwala sa mga duha ka trahedya nga iyang gisagubang gihimo kining inspirasyon ug kakuhaan sa kusog ni Dennis aron siya makahatag og kadasig sa uban usab nga mga makahibalo sa istorya sa iyahang kinabuhi ug hugot usab ang pagsalig niini sa Ginoo.
Hope is Real
Wala pay tuig nga nagminyo sila si Chad ug Maryjoy Hope Daluro o MJ sa dihang nahitabo ang mapait nga trahedya sa NCCC Mall diin usa si MJ sa mga SSI agents nga wala nakalingkawas gikan sa nagdilaab nga mall nga maoy nihunos sa ilang kinabuhi.
“Imagine five years mo nag-uban bag-o lang mo nagminyo kumbaga hopeful ka ba and you are very positive nga naa moy good nga future kamong duha. Naga-imagine nako sa amoang future, sa amoang mga plans, gi-lay down na namo tapos wala lang og kalit,”
Halos mahugno si Chad human nga giingon na sa mga rescuers nga dili na nila masudlan ang 4th floor diin usa ang iyahang asawa nga wala makagawas
“Last namo istorya ana siya Ahavti we’re dying here na please help us ug mao tong last,”
“Tapos giistoryahan dayon nako ang mga officers nga naa pay tao sa taas, nisaka sila unya wala pay mga five minutes ninaog abg mga officers ug niana sila nga dili na daw nila masulod ang 4th floor. Namugnaw gyod ko ato kanang mura ko’g gibuhusan og isa ka baldeng ice ba mura’g bag-o pa man mi nag text-text kay pagtan-aw nako sa among cellphone wala pa may 30 minutes tong last reply niya sa akoa. Ganina pa ang sunog ato kabalo sila nga trapped na sila,”
Nagpabiling lig-on si Chad ug malaumon nga iya kining malampasan ang pagkawala ni MJ.
“Life must go on kumbaga medyo gimingaw of course gimingaw sa akoang asawa. Akoang ginabuhat ron is really trying to convince myself ba kumbaga wala na lagi imong asawa kay naa man usahay tinuod ba tong nahitabo sa ako kay naa pa ka sa denial stage ba kumbaga dili pa ka katoo it’s almost unbelievable nga sa tanang tao sa kalibutan nahitabo to sa imoha,”
Sumala ni Chad dinhi sa kalibutan nga walay exempted sa mga ingon niini nga mga panghitabo, disgrasya o tragic nga panghitabo.
“Death is a reality of life kung makaagi man mo’g ingon ana akoang maistorya is ang pinaka key gyod is to accept although dili mana sya sayon naa gyuy process accept move on with yourself muagi just allow yourself and ayaw hunahunaa it’s the end of the world wala na gyod magunsa nalang man ko grabe na amoang bonding I cannot imagine life without her,”
Nahimong lig-on nga pundasyon sa paglaum ni Chad ang life bio ni Mj sa iyang facebook nga ‘Hope is Real.’
“Hope is real in Christ kay apart from Christ wala man gyod tay hope, wala man gyod tay paglaom. Kana pod nakahatag og encouragement kanako kana nga hashtag nya. Dawat na nako kay anyway mangamatay man gyod ta, sayo-sayo lang gyod siya gikuha and kumbaga nag-una lang siya ba and I know she’s in heaven and I know she’s happy.”
“And we know that in all things God works for the good of those who love him, who have been called according to his purpose.”-Romans 8:28
RadyoMaN Aimee Guinita
