Davao City – Pag-usab sa temperatura ug salinity kun kaparat sa dagat ang hinungdan sa kamatayon sa mga nukos nga midagsang sa Barangay 76-A ning syudad sa milabay’ng semana.
Kini subay sa resulta sa eksaminasyon sa Bureau of Fisheries and Aquatic Resouces (BFAR-XI) sa mga nukos nga nagtapok sa Purok 2, 4, 9 ug 10 sa Bucana.
Sa esklusibong interbyu sa DXDC RMN Davao ngadto kang Madeleine Lourdes Navarce, Regional Fish Health Officer sa BFAR-XI, gipasabot niini nga ang hinungdan sa pagdagsa sa maong nukos posible mao ang massive stranding kun natanggong, naglikay sa mga predator nga dagkong isda nga maoy mukaon kanila, ug lunar influences diin nakalitan sa pag-usab sa klima ang maong mga mananap.
Matud ni Navarce nga normal lang ang kamatayon sa mga nukos ug mamahimong kaunon kini sanglit wala usab makontaminar sa mga kemikal.
Subling nagpahinumdom si Navarce ngadto sa katawhan ilabi na sa mga nagpuyo sa daplin sa kabaybayonan nga kun ugaling adunay kalit mudagsa nga patay na nga isda o uban pang mananap gikan sa dagat, dili usa kini kaonon sanglit kinahanglan pa kini ipailawom sa eksaminasyon.
RadyoMaN Don Pulayao
