Davao City – Posibleng mahimong hinungdan sa sunog ang abusong paggamit sa mga electrical appliances sulod sa balay labi na panahon sa quarantine gumikan sa Corona virus Disease 2019 (COVID-19).
Sa interbyu sa DXDC RMN Davao kang Senior Fire Officer (SFO) 3 Ramil Gillado, Investigation chief sa Davao City Fire District, gibutyag niini posibleng mosangpot sa mga insidente sa sunog ang walay limitasyong paggamit sa mga appliances sulod sa panimalay labi na sa padayong kampanya karon sa lokal nga gobyerno ang ‘Stay At Home” gumikan sa pandemic.
“Ma-consider nato na siya (nga factor) kung dili pud ‘ta magmabinantayon ug maging abusado sa atong mga gamit kay naa tanang miyembro sa pamilya sulod sa panimalay. Ang pinaka ma-abuso nato diha is ang atoang electrical nga gamit nato,” saysay ni Gillado.
Subling gipahimangno ni Gillado nga likayan ang overloading sa appliances o ‘octopus’ connection sulod sa balay aron malikayan ang mga insidente sa sunog.
Hinuon, gibutyag sa Fire officer nga taas na karon ang awareness sa publiko labot sa paglikay sa sunog hinungdan nga ubos, ang natalang ihap sa fire incidents ug damyos sa sunog sa syudad sa Davao sa milabay’ng mga bulan.
RadyoMaN Kirby Manzon
