Davao City – Karon nga nagkaduol na ang adlaw sa Kapaskohan, pipila sa atong mga kaigsoonang Kristiyano nagapahimutang na sa ilang tagsa-tagsa ka mga Christmas decors diha sa ilang mga panimalay.
Tungod niana, nagpahimangno karon ang Bureau of Fire Protection (BFP) Davao Region pinaagi kang Senior Fire Officer (SFO 3) Ramil Gillado nga siguraduhong adunay tatak sa international quality standard ug siguraduhon ang kalidad sa mga materyales sa mga paliton nga mga Christmas lights pinaagi sa paglantaw sa male plug nga dili kini daling mabali.
Basahon ang instruction sa maong lights kun outdoor or indoor use ba kini, siguraduhong dili kini makab-ot sa mga kabataan ug usab ngadto sa mga daan na nga mga Christmas lights, siguraduhong wala kini mga panit nga wires ug wala kiniy damage sanglit gi-discourage kining ipagamit aron dili mamahimong hinungdan sa sunog, pasidaan ni Gillado.
Nagsugyot usab karon ang kabomberohan sa rehiyon nga paminawon ang tanang pahimangno ug kanunay nga magmaigmaton aron mamahimong luwas sa sunog ug disgrasya ang selebrasyon sa Pasko ug Bag-ong Tuig.
RadyoMaN Paul Canono
