Tumang kalipay sa mga BHW kon barangay health workers tibuok Sarangani Province sa nahitabo nga duha (2) ka adlaw nga Provincial BHW Congress nahuman ato lang adlaw nga Byernes gumikan kay gawas sa pa-surpresa nga gihatag kanila sa lokal nga gobyerno sa Sarangani, niduaw pud kanila ang BHW Partylist gikan pa sa kauluhang Maynila dala ang mga maayong balita ug benipisyo ngadto sa ilang sektor.
Anaa mismo nitambong sa opening program sa ikalima (5th) nga Provincial BHW Congress sa probinsya sa Sarangani niaging adlaw nga Hwebes ang chief of staff ni BHW Partylist Congresswoman Angelica Natasha Co nga si Ms. Ayeen Sian. Iyang giubanan sila Governor Steve Chiongbian Solon, Vice Governor Elmer De Peralta, Provincial Health Officer Dr. Arvin Alejandro ug mga board member, sila Board Members Joseph Calanao, Odoy Jamora, Jong Falgui, Dr. Ruiz ug IPMR Ben Donato, anaa pud si Maasim Mayor Zyrex Pacquiao.
Segun ni Sian, higayon na matud pa nilang mapabalo sa tanan nga adunay BHW Partylist nga nakakuha og usa (1) ka pwesto sa Kongreso human sa May 2019 Elections. Unang higayon nila karon nga nakadaog sa eleksyon maong dili na nila matud pa palampason ang panahon nga hinanaling mupasa og mga balaudnon alang sa kaayuhan sa tanang barangay health worker sa entiro Pilipinas.
Ila na matud pang napasang-at ang House Bill No. 3985 kon BHW Act of 2019 matagaan og security of tenure ang mga BHW nga dili mapahawa bisan lahi ng opisyal ang gadumala. Matagaan usab silag linibo ka pesos isip fix nga panweldo, may scholarship pa sa ilang kabataan, ug assistance para sa medical ug burial.
Dako na lamang ang pagpasalamat sa BHW Partylist sa pag-imbita kanila sa libuan ka mga BHW entiro Sarangani gipangunahan ni Sarangani BHW Provincial Federation President Merly Nebres, kung diin ang venue ang nahitabo sulod sa Maasim Municipal Gymnasium. Sunod tuig 2020, ang lungsod sa Maitum napud ang host sa Provincial BHW Congress.
Apan mas labing gikalipay sa mga BHW ang gibutyag ni Governor Solon kanila kauban ang mga board member nga subling patas-an ang ilang binulang honorarium. Kini ang gikumpirma ni Ms. Lizet Lim, ang program manager sa mga BHW. Gipatuman pud ang accident insurance aron kadtong maaksidente nga mga BHW ang matagaan og ayudang pinansyal. Nanghinaot na lamang ang Gobernador nga mapatuman na ang Universal Health Care program ni Pangulong Rodrigo Duterte sa Sarangani aron muabot na gyud sa libo ka pesos ang mahimong madawat nga monthly allowance sa mga BHW.
Dili tiaw ang trabaho sa mga barangay health workers sa Sarangani Province tungod kay dili lang sila katugbang sa lokal nga gobyerno sa pagpatuman sa mga programa sa maayong panglawas sa mga kabarangayan kundili sila usab ang kaabag sa disaster preparedness and responses apil na sa peace and security initiatives. Una ng nagkatigum niaging semana ang mga BNS o barangay nutrition scholars, sila pud tong nakatutok sa nutrition program.
Sa panahon lang ni Governor Solon natagaan og honorarium gikan sa probinsya ang mga BHW, sa dakong pagsuporta sa Sangguniang Panlalawigan ug nila Senador Manny ug Congressman Ruel Pacquiao.
