Mainiton nga pagsaulog sa National Heroes Day, Adlaw sa mga Bayani, karong adlawa, adlaw nga Lunes, timaan sa mainiton nga pakigbisog sa atong mga bayani nga nibuhis sa ilang mga kinabuhi alang sa kalingkawasan sa Pilipinas.
Niini karong modernong panahon, daghan ng matawag nga mga modernong bayani tungod sa ilang matag adlaw nga pag-sakripisyo makalingkawas lang ang isig ka Pilipino sa pakigbisog sa kinabuhi, usa na niana ang mga tigpatuman sa programa sa maayong panglawas, hilabi na ang mga BHW kon barangay health workers nga taliwala sa honorarium ang walay puas sa ilang pagserbisyo sa mga lagyong purok ug sityo.
Sa labing unang higayon, gideklara nga kampyon sa Performance-Based Incentives ang kahugpungan sa BHW Sarangani sa entiro Rehiyon Dose. Nagsunod lang ang BHW Sarangani sa BHW South Cotabato niaging mga tuig apan karong tuiga ang nasakmit na gyud sa BHW Sarangani ang 1st place kung diin may premyo kini nga One Hundred Twenty Thousand Pesos (P120K).
Nahitabo ang awarding niaging lang adlaw nga Byernes sulod sa Greanleaf Hotel atol sa 2019 DOH Annual Regional/Mega Awards Ceremony, kauban sila DOH Assistant Secretary for Visayas and Mindanao Doctor Abdullah Dumama ug DOH Regional Director Aristides Tan.
Si Gina Manisan, ang BHW sa Maribulan, Alabel ug maoy vice president sa BHW Sarangani, ang nagdawat sa award kauban si Provincial Health Officer Doctor Arvin Alejandro ug ang mga division chief niini sa PHO Sarangani. Mapasalamaton si BHW Manisan sa suporta nga gihatag kanila sa barangay, munisipyo ug sa probinsya sa pamunuan ni Governor Steve Chiongbian Solon.
Sa panahon lang ni Governor Solon natagaan og binulang honorarium gikan sa probinsya ang mga barangay health workers sa Sarangani Province pinaagi sa pagmugna sa gitawag nga BHERT (be-hert) kon Barangay Health Emergency and Resiliency Team program, sa pagsuporta sa mga board member, Vice Governor Elmer De Peralta, Senador Manny ug Congressman Ruel Pacquiao.
Gawas sa BHW award, laing baynte-uno (21) pud kabuok award ang nadawat sa probinsya ug sa mga munisipyo sa Sarangani atong Byernes sa pagpatuman sa mga maayong health program entiro Region 12. Nakadawat ang Sarangani Provincial Health Office sa Purple Ribbon Award kabahin sa reproductive health program. Nasungkit pud sa Sarangani PHO ang mga award sa maayong programa aron batukan ang sakit nga Malaria ug Filariasis tungod kay wala nay natala nga naigo sa maong balatian sa Sarangani.
Nagpabilin usab nga gihuptan sa Sarangani PHO ang pasidungog sa zero-open defecation tungod labing daghan ang panimaly nga aduna nay mga comfort room. Natagaan pud ang Glan Medicare Community Hospital og award nga Most Outstanding Hospital Epidemiology and Surveillance Unit, ilalum sa superbisyon gihapon sa PHO Sarangani. Nakadawat pag special award nga Sandugo Award ang Sarangani tungod sa aktibo nga blood donation program matag tuig. Atngan ta ugma ang detalye sa mga award nga nadawat sa mga munisipyo ug sa mga cash incentives.
Photo courtesy: Ms. Razel Bustria & Mr. Bong Yadao, PHO Sarangani
