Davao City– Patay ang usa ka bigtime drug pusher human misukol sa mga operatiba sa Calinan PNP atol sa gilusad nga simultaneous nga anti-criminality sa tibook siyudad kaganinang kadlawon.
Daghang samad pinusilan sa kalawasan ang gikamatay ni Amrudin Beruar alyas Pango, hamtong ug nag-puyo sa Purok 39 Abayon Village, Calinan ning dakbayan.
Nadakpan sab nga buhi sa mga awtoridad ang igsoon sa namatay nga si Abdul Beruar.
Sumala ni Police Chief Inspector Mike Uyanguren, Hepe sa Calinan PNP, magsilbi unta og search warrant ang iyang mga ginsakpan sa panimalay sa mga suspek dihang namusil si alyas Pango alas 2:00 sa kadlawon.
Napugos og balos ang kapulisan og pusil kang Pango resulta sa iyang kamatayon.
Narekober gikan sa possession sa mga suspek ang 17 ka sachet nga shabu, .357 caliber, ug granada.
Napaslak na sa Calinan PNP ang igsoon sa napatay nga si Abdul samtang gihikay na sab ang kaso subay sa pagsupak sa Republic Act 9165 kun Comprehensive Dangerous Drugs Act of 2002.
RadyoMan Joel Viray
