Davao City – Gikatakdang sa sunod tuig pa o sa 2020 hingpit nga ma-implementar ang bag-ong balaod nga pagbutang og mas dakong plate number sa mga motorsiklo subay sa Republic Act 11235 o “Motorcycle Prevention Act” nga gilagdaan ni Pangulong Rodrigo Duterte.
Sa pakighinabi sa DXDC RMN Davao kang Atty. Gomer Dy, ang Regional Director sa Land Transportation Office (LTO)-XI, gisaysay niini aduna pay agi-ang proseso ang nahisgutang balaod ayha kini hingpit nga mapatuman.
Gibutyag ni Dy nga aduna pay mugnaong komite alang sa pag-draft og Implementing Rules and Regulations (IRR) sa balaod ug human niini muagi pa kini sa public hearing dayon ang publication.
“Bubuo pa tayo ng komite to draft the IRR. Pagkatapos ng IRR, i-public hearing sya, i-publish, so that masugdan na ang implementation. Mga next pa ata ang implementation nyan. Dili makaya this year tungod sa IRR,” segun niini.
Nasayran nga tumong sa maong bag-ong balaod nga daling makita ug ma-identify ang motorsiklo labi na kung nalambigit kini sa krimen o aksidente.
Adunay usay silot nga pagkakulong og unom hangtud dose ka tuig o kaha multa nga muabot sa P50,000 hangtud P100,000 ang atubangon sa malapason sa nahisgutang balaod.
RadyoMaN Kirby Manzon
