SILAY CITY – Amay kag duwa ka utod sang bigtime druglord sa Silay City, nadakpan sa drug operation sang Silay PNP kaina mga las 4 sang hapon.
Ang operasyon sang Silay PNP kag Philippine Drug Enforcement Agency ang base sa search warrant nga gin-issue ni RTC Judge Ana Celeste Bernad.
Subject sa amo nga drug operation ang mag-amay nga Felizardo kag Kenneth Divinagracia, residente sang Brgy. Mambulac, syudad sang Silay.
Una gin-aresto ang amay nga si Felizardo matapos akto ini nga nadakpan nga naga-daho sang suspected shabu sa mga drug operatives sa ginpatigayon nga buy bust operation sa kalye Onse, Brgy. Mambulac sang amo man nga syudad.
Necover sa balay ni Felizardo ang 11 ka sachets sang suspected shabu nga may market value nga kapin syen mil pesos.
Narecover man sang PDEA kag Silay PNP gikan sa amay nga Divinagracia ang kapin siete mil pesos nga cash nga ginapatihan benta sang illegal nga droga.
Gin-dakup naman sang kapulisan ang bata ni Felizardo nga si Bryan Divinagracia nga yara sa puluy-an sang ginpatigayon ang drug raid. Sa seperado nga operasyon pina-agi sa warrant of arrest, nadakpan naman si Kenneth Divinagracia sa Purok Patuloy, sang amo man nga barangay.
Narecover sa balay ni Kenneth nga 13 ka sachets sang suspected shabu nga may market value nga 75 mil pesos. Suno sa hepe sang Silay PNP – Police Supt. Noel Polines nga lakip sa mga strategy sang mga suspek amo nga ila ginaputos ang ginapatihan nga shabu sa dolce nga snowbear.
Paathag ni Polines nga mabudlay nga e-penetrate ang puluy-an ni Kenneth bangud man nga suportado ini sang mga residente sa palibot.
Si Felizardo kag Kenneth ang amay kag utod sang number 1 nga drug personality sa syudad sang Silay nga si Michael Divinigracia.
Si Michael ang gina-tudlo nga recipient sang kapin 18 milyones nga balor sang illegal nga droga nga na-recover naman sang otoridad gikan sa mag-asawa sa Dumangas Port sa Iloilo sadtung bulan sang Enero.
