SIPALAY CITY – (2nd Update) Gindis-armahan ang mga security guards nga naga-bantay sa Maricalum Mining, Brgy. San Jose (MINA), syudad sang Sipalay.
Natabu ang insidente pasado alas 4:30 kagapon kaina sang hapon sa diin kapin sa walo ka mga armado nga kalalakinhan ang nag-kuha sang mga armas kag pagkabutang sang anum ka security guards (Ultrafine Security Agency) nga naga-bantay sa minahan.
Suno sa hepe sang Sipalay PNP – Chief Inspector Romeo Vargas nga nakuha sa mga gwardia ang anum ka shotgun, isa ka 9mm kag mga cellphones.
Paathag ni Vargas nga naka-suksok sang fatigue army uniform ang mga nag-salakay nga armado apang wala naman ini sila nagpakilala nga mga katapo sang rebeldeng grupo.
Dugang pa sang hepe sang Sipalay PNP, nga ang pagpati sang mga security guards nga mga katapo ini sang Philippine Army ang mga armado nga lalaki rason nga ila pa gani ini gin-tanyaw sang ‘Maayong Hapon’.
Nahibalu-an nga sa walo ka mga armado nga nagsulod sa minahan, duwa diri ang naga-suksok sang bonnet.
Samtang, wala naman gin-hilabtan sang mga armado ang anum ka security guards sa diin ginpangkuha lang ang ila mga armas.
