General Santos City–Gikumperma ni Police Lt. Renato Dungca Jr., Spokesperson sa gensan City Police Office nga gipasakaan na ug kaso ang suspetsadong si Ali Abad, legal age nga taga barangay Mabuhay, Gensan kansa una nang nadakpan sa gipahigayong Buybust operation niadtong nakalabayng adlaw sa may Purok 4, Pag-asa Vill., Barangay Mabuhay.
Kasong kalapasan sa RA 9165 ilawom sa sec. 5 ug Section 11 ang kasong giatubang karon sa nasampit nga suspetsado.
Nasayran nga una nang mikagat sa paon sa kapulisan ang nasampit nga miresulta sa pagkasikop niini human nga napalitan kini ug usa ka sachet sa gituhang shabu ug nakuhaan pa ug laing 29 ka sachet sa gituhang shabu.
Dugang pa ni Police Lt. Dungca nga ilang konsiderang bigtime pusher ang nahisgutang suspek, kini gumikan sa gidaghanon sa iligal nga droga nga nakumpiska gikan sa iyng posisyon.
Nasayran nga ayha gihimo ang buybust operation, pipila usab ka adlaw nga gipaniad-an sa kapulisan ang suspek hangtud nga gipahigayunan kini ug operasyon.
