Davao City- Gipalawman sa Davao City Police Office (DCPO) ang imbestigasyon sa pagpusil patay kang Atty. Sitti Gilda Mahinay-Sapie ug bana niini nga si Muhaimain Sapie sa mismong subdivision nga ilang gipuy-an sa Barangay Talomo ning syudad sa Davao pasado alas 5:00 sa hapon niadtong Miyerkules, Hunyo 14, 2021.
Sa interbyu sa DXDC RMN Davao kang DCPO City Director Police Col. Kirby John Kraft, lakip sa ilahang giimbestigahan ang giingong bikil tali sa abogada ug sa Board of Directors sa Home Owners Association sa subdivision diin nahitabo ang krimen.
“Allegedly tinake-over nila Attorney, hindi ko alam kung bakit nila na-take over, kung nagkaroon ba ng election iyon ang inaalam natin. Usually may mga policy o rulings sila na dinadaan sa HLURB (Housing and Land Use Regulatory Board). Siguro nagkwe-kwestyunan pa sila ng legalities. Kasi doon tinake-over nila, niransak nila iyong club house. Nagkaroon ng verbal tussle with one of the board at saka ni Attorney,” segun ni Kraft.
Subay niini, daghang gihawiran nga kaso si Atty. Sapie ilabina sa problema sa yuta.
Gisaysay sa mga nakauban sa abogada kang Kraft, atol sa pagpamusil adunay gaandar nga itom nga sakyanan (fortuner) nga ilang gidudahang didto nisakay ang gunman. Gigukod kini sa mga body guards sa biktima apan wala na kini naapsan.
Matud ni Kraft, walay logbook sa mga mosulod sa subdivision ug igo lang kuhaon ang ID ug kambyuan og pass sa subdivision.
Adunay narekober nga slugs sa crime scene ug padayong gisuta karon sa Regional Crime Laboratory Office 11 aron sayron ang gigamit nga armas.
Nangita pa usab og dugang ebidensiya ang kapulisan aron matumbok ang mga naghimo sa krimen ug motibo sa pagpatay sa magtiayon.
RadyoMaN Aimee Guinita
