Pilar, Capiz- “Biktima lamang ako sang fake news”, ini ang nangin sabat ni Pilar Mayor Gideon Ike Patricio angut sa report nga isa siya sa igapaidalom sa lifestyle check sang NBI Region-6. Sa interview sang dyVR RMN-Roxas, ginsiling ni Patricio siya ang biktima lamang sang mga sala nga reports ukon impormasyon nga nakalab-ot sa NBI nagikan iban nga katapo sang media sa syudad sang Iloilo.
Nagpamalibad naman ini nga maghatag sang dugang nga komento angut sa amo nga isyu apang ginpasiguro nga nakahanda siya nga magkooperar kun igapatigayon gidman sang NBI ang lifestyle check sa iya. Kadungan sini, matigdas ang mga tinaga sang amo nga alkalde batok sa mga bashers kag mga troll accounts nga nagabatikos sa iya kasunod sang amo nga isyu.
Sa madumduman, kalakip sanday Pilar Municipal Mayor Gideon Ike Patricio kag Roxas City Mayor Alan Celino sa mga local government officials nga ginhingadlan sang NBI-Regional Office 6 nga igapaidalom sa imbestigasyon kag lifestyle check.
