General Santos City–Nagpabilin pang nagpaalim sulod sa balay tambalanan ang biktimang si Arnel Jumantoc, 39 anyos,habal-habal driver ug nanimuyo sa Phase 3, Doña Soledad Labangal, Gensan kansa gidunggab sa wala mailhi niining duha ka pasahero alas 12;30 sa buntag.
Saysay sa biktima nga gikan kini sa Doña Soledad ug dunay duha ka pasahero nga gustong magpahatod sa Lagao apan sa paghidangat sa lugar mipakanaog ang duha ka suspek ug mibunlot ug kutsilyo ug diretso dunggab sa nasampit.
Pagpaklaro usab sa nasampit nga habal-habal driver nga nakasukol pa kini atol sa panghitabo apan paspas nga nakasibat ang mga suspek ug sumala pa niini nga iyang mailhan ang nawong sa suspek kung iyaha kining makita.
Dugang pagbutyag ni Arnel Jumantoc nga nakita niya ang pasahero niini nga anaa sa likod nga mibunot ug nagtuo kini nga mobayad apan kutsilyo matud pa ang gikuha ug diretso duslak sa iyang kilid hinungdan nga iyang giilog ang kutsilyo sa pamasin nga makabalos.
Paspas man usab mikaratil ug dagan ang duha ka suspek padulong sa kasagingan nga bahin ug gisulayan pa niini paggukod apan wala na niini naabatan ug gilayong mipatala sa kapulisan aron ipahibalo ang nahiatbo kaniya.
Nagtuo ang biktima nga gustong siyang patyon sa mga suspek aron makuha niini ang iyang motorsiklo hinungdan nga siya gidunggab nga miresulta sa pagkaigo niini sa nagkadaiyang parte sa iyang kalawasan. (Reynald Timario)
