General Santos City–Positibong giila sa mga kabanay niini ang lalaking una nang nakit-an patay nga naputos ug samad dinunggaban sa iyang kalawasan sa kamaisan nga bahin sa may Purok Udagre, barangay Conel, Gensan, kagahapon sa buntag.
Ang biktima giilang si Elmer Afila, 40 anyos nga taga Silway Fatima, Barangay West, Gensan.
Sumala ni Dodo Torebillas, bana sa ig-agaw sa biktima nga Domingo dihang sila natingala nganong wala makauli ang nasangpit nga biktima gikan sa iyang trabaho.
Sa facebook lang nila nasayran nga namatay na ang biktima mao nga ilang gisuta sa puneraryang gidad-an kaniya. Basi sa sitwasyon sa patayng lawas niini, dagko kaayo ang mga samad dinunggaban, timailhan nga dakong sutsilyo ang gigamit sa pagpatay sa nahisgutan.
Aminado si Torebillas nga duna gyoy batasan ang biktima inig kini mahubog apan iyang giklaro nga usa man usab kini ka ubutan nga tawo. Dugang pagbutyag ni Torebillas nga aduna na silay gidudahang suspek sa pagpatay kang Afila apan dili una nila kini ibutyag gumikan nagpadayon pa ang imbistigasyon sa kapulisan.
