CAPIZ – Mabinungahon ang guinpatigayon nga duha ka adlaw nga journalism workshop sang provincial government nga ginpangunahan sang Capiz Aksyon News Center nga may tigulo, Binhi:2017 Aksyon Agad Public High School Press Conference, Oktubre 12-13, 2017.
Talalupangdon ang guinpakita nga interes sang tanan nga pampubliko nga high school sa Capiz sa diin nalapawan ang guinlauman nga 180 ka partisipante bangud naglab-ot tanan sa 201 ang aktibo nga nagpasakop. Para sa mga partisipante dako nga bulig para sa ila ang seminar nga ang nagapanguna nga katuyuan amo ang pagpasangkad sang ila abilidad kag mangin responsabli sa pagpalayag sang impormasyon.Ang ila natun-an ang sarang nila mapatuman sa ila school papers.
Nangin dinapit nga bisita sa aktibidad sanday DepEd Capiz Schools Division Superintendent Dr. Mac Aposin, Dr. Nerissa Recente sang Roxas City Division , KBP Capiz Chairman Rexam Laguda kag NUJP Capiz President Rico Infante nga lunsay nagdayaw sa hilikuton kag nagpahanumdom sa kabataan nga mangin maalam kag gamiton sa husto ang ila kinamatarong sa pagpahayag.
Pila sa mga taghambal sa amo nga press conference amo sanday journalist Mr. Nestor P. Burgos para sa news writing samtang naghatag naman sang mga inputs angut sa radio script writing and reporting si Radyoman Joeny Bigay sang dyHB RMN Bacolod.
Personal naman nga guintugyan sang mga partisipante kay Governor Tony del Rosario ang binhi nga ila natipon kabaylo sang libre nga kaalam nga ila nabaton.
Nagasalig ang Gobernador nga ang guintanum nga binhi sang kaalam sa kabataan mangin mabakod nila nga pundasyon sa palaabuton bilang responsabli nga katapo sang media kag komunidad.
(c) Capiz Aksyon News Center
