Bise Mayor nan Surigao City dismayado sa polisiya sa PPA na tagpagawas an mga na-stranded na pasahero ug rolling cargoes epekto sa bagyong Vinta Disyamado si Acting Mayor Vice Mayor Alfonso Casurra sa nahimong bag-ong polisiya ug lakang nan kadagkuan sa Phil. Ports Authority adton notumaw an bagyong Vinta, ini human na tagpagawas gikan sa Lipata Port ug PPA Base Port, Surigao City an 553 kabuok pasahero ug kapin 200 na mga rolling cargoes. Sumaya pa niini, morag tagpasa nan PPA an ila obligasyon ngadto sa Local Gov’t. Unit na kon huna-hunaon an bisan piso an waya makadawat nan buluhisan an siyudad gikan sa operasyon sa amo na ahensiya. . Tagtudlo ni Casurra, an LGU na an naghatag nan panginahanglanon nan mga pasahero na unta ini responsibilidad nan PPA. Gani tag-angkon niini, sa pipila ka higayon na mag-istorya sila ni Mayor Ernesto Matugas kabahin sa PPA ug stranded na mga pasahero, permi ipasa sa LGU an angay na himoon. Sa dihang pagpagawas an mga pasahero ug tagdaya ngadto sa Lipata High School sanan Mariano Espina Elem. School, morag nanghinaw an PPA sa ila responsibilidad, matud pa ila area ug angayan na sila unta an mosagubang sa galastuhon sa pagpakaon sa mga na-stranded na pasahero. Kon klaruhay ra na pagtuki, wayay income an siyudad sa operasyon sa PPA. Awhag pa niini, angay na pakisayran sa PPA lakip sa mga bus companies ug shipping companies an mga panginahanglan sa mga pasahero, dili kon magtukyod-tukyod. Sa tuyo ka adlaw na pagka-stranded nan mga pasahero an nagpakaon niini an barangay lakip an kadagkuan sa City Social Welfare and Dev’t. kaiban an pipila ka Non-Gov’t. Organizations o NGO. An amo na pagka-dismaya nan Bise Mayor an tagpaabot human nadawat an pipila ka sumbong sa mga pasahero na an mga Shipping ug Bus Companies an waya sila pakan-a, an iban nagreklamo isab na naglisod sa paggamit nan Comfort Rooms gumikan kay sirado an PPA sa Lipata ug Base Port sa Bilang-Bilang Area, Surigao City. Lain pang pagsaway tagpaabot nan mga iban na pasahero na nagbayad man unta sila nan Terminal Fee sa PPA, uno na waya sila tuguti sa paggamit sa pasilidad. Kon kahinumduman, una na tagpadayag nan PPA Port Manager Mildred Padilla an pagsira ug pagpagawas sa mga na-stranded na pasahero ug rolling cargoes sa PPA Lipata ug Base Port adton nasinati an epekto sa bagyong Vinta sa kahadlok na basin una na maapektuhan o maguba an ila mga edipisyo sa bagyo.
