Dapitan City, Zamboanga del Norte – Kritikal ang kahimtang sa usa ka biyudo dihang gidunggab sa usa ka ulitawo nga karibal niini human sa ilang lalis gumikan sa gugma, nga nahitabo sa miaging adlaw, alas 10:20 sa gabii, didto sa Sitio Bacong, BarangayTaguilon, sakop sa dakbayan sa Dapitan.
Ang biktima nailhan nga mao si Danilo Seño Rio, 49 anyos, biyudo, samtang gitudlong suspek mao si Vic Tanyar Enoc, 20 anyos, ulitawo ug ang duha managsilingan sa maong dapit.
Sa inisyal nga imbistigasyon ni PO2 Nick Quimiguing imbistigador sa Dapitan City Police Station, nasuta nga ang biktima ug ang suspek nagkaribal diay sa pagpanguyab sa usa ka maanyag nga dalaga sa ilang dapit.
Atol sa hitabo ang duruha nagabot ang dalan diin polos lango sa ilimnong makahubog ug didto nagsinokmatay nga nisangpot sa pagbinayloay sa bati nga mga polong.
Ang maong panaglalis niresulta sa dakong away hangtud nga ang suspek nisibat sa pagpauli, samtang ang biktima nahapit sa tindahan sa usa ka Warlito Liquigan, barangay tanod sa dapit kay nipalit ug segarilyo.
Pipila ka minutos ang nilabay, nibalik ang suspek nga dunay dala nga kutsilyo diin naabtan niini ang bikitma og gihansakan sa makadaghang higayon.
Ang biktima nakadipos-dipos og panagang, nakahiagom sa samad dinongaban sa tuong bahin sa tiyan, duha sa may walang dughan, isa sa walang ilok, ug isa usab sa walang bokton hinongdan gidalig tabang og gidala sa Dr. Jose Rizal Memorial Hospital sa dakbayan sa dapitan aron katambalan, apan gumikan sa daghanan samad gibahin kini pagdala sa Zamboanga del Norte Medical Center ning dakbayan sa dipolog ug karon anaa pa sa talandugon ang kahimtang.
Ang suspek wala ka sibat human gisignit sa tanod nga si Warlito ug nabawi ang kutsilyong gigamit nga dunay gitas-on, onse pulgadas ug nabalhug na karon sa prisohan samtang gihikay ang tukmang sumbong nga ipasaka batok kaniya.
