Davao City – Magpahigayon na usab sa tinuig nga aktibidad ang mga deboto sa Itom nga Nazareno sa kapilya sa New Lanzona, Matina, Davao City atol sa kapistahan sa patron karong Enero 9, alas 4:00 sa kadlawon.
Sumala ni Nanay Norma nga usa ka deboto, magpadayon ang ilang kalihukan sama sa prosesyon sa rebulto sa itom nga Nazareno diin maglakaw sila nga walay sandalayas gikan sa Mc Arthur Highway padulong sa San Pedro Cathedral ug motuyok sa Quimpo Boulevard ug balik sa New Lanzona, Matina ning siyudad.
Gilaumang mas daghan ang mosalmot sa maong prosesyon inabagan sa mga personahe sa Traffic Groups, CTTMO ug seguridad sa kapolisan.
Pangaliya ni Nanay Norma nga unta maundang na ang mga kalamidad sama sa linog nga nakahatag og kahadlok sa katawhan sa Mindanao.
Nanawagan usab siya sa mga deboto sa nagkalain-laing lugar sa Davao Region nga mosalmot sa maong kalihukan inubanan sa silang mga pag-ampo aron mahatag kanila ilang mga gipangayo.
RadyoMaN Paul Canono
