Davao City – Tradisyon na sa mga Pilipino ang muoli ug mubakasyon sa tagsa-tagsa ka lugar sa gigikanan sa mga kaliwatan panahon sa Holy Week kun Semana Santa.
Praktis na sa pamilyang Pilipino ang paghinumdom sa kamatayon sa krus ni Kristo Hesus kapin dos mil na ka tuig ang nakalabay busa muoli gayod ang mga nanimuyo sa laing lugar aron makauban ang mga kaliwatan sa matag kuwaresma.
Si Davao City Transport and Traffic Management Office (CTTMO) Operations Head Bonifacio Capricho adunay tam-bag sa tanang mupauli ug mubakasyon nga sigurohon nga kondisyon gyud ang sakyanan una pa man mularga.
Gidasig ni Capricho ang mga adunay behikulo nga dili magsalig nga brand new ang sakyanan kay dili kana garantiya aron makalikay sa disgrasya sa kadalanan.
Segun ni Capricho nga bisan og depensado magmaneho ang usa ka driver apan ang uban reckless mag-maneho busa puwede gihapon madisgrasya samtang maglawig sa dalan.
Sumala ni Capricho nga importante sigurohon ang kondisyon sa battery, lights, oil, water, brake, air, gas, engine, tire, ug self kun ‘BLOW BAGETS’ sa sakyanan alang sa luwas nga pagbiyahe.
Ug dili sab kalimtan ang pagbaon og reserba nga gilid ug kumpleto nga tools aron adunay magamit panahon nga ma-flatan ug uban pa nga contingencies.
Gikinahanglan usab nga makapahulay og unom hangtud walo ka oras ang driver aron makasustiner sa taas nga biyahe kay lisod na kung sa dalan pa makatulog basin mao pa’y hinungdan sa dili matagna nga kamatayon.
Ug kung mahimo, magdala gayud og ka relyebo nga driver aron kung bation og katulogon, aduna dayoy makapuli sa manibela aron ‘iwas disgrasya’ ug makaabot gayod sa destinasyon, dugang sa kanhi police traffic investigator.
RadyoMaN Joel Viray
