General Santos City–nagtingkagol karon sa Police Station 2 ang usa ka Bodyguard sa usa ka kapitan sa dakbayan sa Gensan atol sa gihimong operasyon sa hiniusang pwersa sa Police Station 2 ug Malapatan Municipal Police Station alas 2:00 pasado ang takna sa hapon, Kagahapong Adlawa, Nobyembre 20, 2017.
Suspek giilang si Dexter Mendoza, 37, Bodyguard ni Apopong Kapitan Ramil Rabanes, ug nanimuyo sa Purok 5, Lanton Barangay Apopong ning syudad.
Gisikop ang nahisgutan pinasikad sa usa ka warrant of arrest sa kasong homicide nga pinirmahan sa sala ni Hon. Judge Panambulan Mimbisa sa RTC Branch 37 sa usa ka gasolinahan sa Barangay Apopong ning syudad.
Sumala pa ni Police Chief Inspector Romeo Calamba ang Deputy Chief Of Police Malapatan Municipal Police Station nga dugay na nilang gipangita ang nasangpit nga suspect human kining nagtago-tago.
Human nilang nasayran nga nag trabaho kini sa Barangay Apopong, ila dayon kining giberikipa ug dihang nagpositibo, ila dayon gihimo ang operasyon. Nasayran nga nakuhaan pa ug duha ka mga sachet sa gikatahapang shabu ang suspek atol sa pagkapkap sa lawas niini dihang gidala na kini sa Police Station 2.
Dugang kasong kalapasan sa RA 9165 ang ipasang-at batok sa suspek, samtang commitment order nalang usab ang gihuwat aron nga mabalhin na kini sa Gensan City Reformatory Center tungod sa kasong Homicide nga iyang giatubang. (Dave Silagan)
