Davao City – Arestado sa Davao City Police Office (DCPO) ang responsible sa pagbilin sa duha ka mga bomb threat letters nga narekober dinhi sa dakbayan sa Davao.
Sa eksklusibong interbyu sa DXDC RMN Davao kang Police Col. Kirby John Kraft, DCPO City Director gibutyag niini nga nailhan ang suspek pinaagi Closed-Circuit Television (CCTV) footage.
Wala pa gipagula ni Kraft ang pangalan sa 34 anyos nga nadakpang suspetsado.
Adunay gisugo nga bata ang suspek sa pagsulat sa maong bomb threat ug gibilin kini sa may Davao City Hall niadtong Disyembre 20, 2021.
Gikumpirma ni Kraft, kini usab ang nibilin sa laing threat letter niadtong Setyembre 20, 2021.
Giduso batok sa suspek ang kasong paglapas sa Presidential Decree 1727 o “Anti-Bomb Joke Law”.
Sa nagpadayong joint investigation sa DCPO ug Task Force Davao, ginatuki pa sa mga awtoridad kung aduna ba kini koneksyon sa ubang mga grupo ug ang background sa dinakpan.
Nagpasidaan si Kraft sa mga adunay planong magbugal-bugal kabahin sa bomba nga dili sila magpanukong arestuhon ug kasohan kini.
RadyoMaN Aimee Guinita
