Davao City – Nagpahinumdom na karon pa lang daan ang Davao City COVID-19 Task Force (TF) sa mga Dabawenyo labi na kadtong dili pa vaccinated nga magpabakuna na batok Coronavirus Disease 2019 (COVID-19).
Matud ni Dr. Michelle Schlosser, Spokesperson sa Davao City COVID-19 TF nga kinahanglang maprotektahan ang kaugalingon panahon sa eleksyon labi nga daghan ang mga tawo nga muboto atol sa piniliay.
Gisulti sa health official nga kinahanglang pahimuslan sa mga wala pa nakapabakuna ang mga naga-abot nga bakuna sa syudad nga gina-rollout sa mga vaccination sites sa dakbayan.
“Kung gusto man gyud ta makaboto gyud, dapat healthy ‘ta on the day nga magboto ‘ta. So dapat, aside sa social distancing, magpabakuna gyud ‘ta kay para ang pagboto nato sure ‘ta nga secure ‘ta kay definitely, there will be a lot of people nga magboto,” sulti ni Schlosser.
Sa pagkakaron, ginasapinal pa sa Commission on Elections (COMELEC) uban ang Inter-Agency Task Force (IATF) ang voting guidelines alang sa luwas ug hapsay nga eleksyon sunod tuig luyo sa pandemya.
RadyoMan Kirby Manzon
