Davao City – Misimpatiya karon si Davao City First District Councilor Pilar Braga sa kahimtang sa mga estudyante karon human naapektaran ang ilang pagtuon gumikan sa sagunson nga linog sa North Cotabato, Davao Del Sur ug ubang bahin sa Mindanao niadtong October 16, 29 ug 31.
Gibati og kaluoy si Braga sa sitwasyon karon sa mga estudyante tungod sa mga linog nga niguba sa mga tulonghaan sa elementarya ug sekondariya sa naasoy nga mga probinsiya nga maoy nagpadiskaril sa pagtoon sa mga kabataan.
Sa datos nga gipagula sa Department of Education, kapin 500 ka mga eskwelahan nadaut diin ang uban nangahugno ug nadamyos ug dili na magamit ug mapuslan hatod sa sobra kakusog sa mga linog nga mihampak sa dakung kayutaan sa Mindanao.
Samtang ang ubang mga eskwelahan nga wala matam-i og maaayo sa katalagman maoy gigamit nga mga evacuation centers alang sa temporaryo nga kapuy-an ug kapasilungan sa mga biktima sa linog.
Matud ni Braga, wala siya’y nakita nga problema nga gipundohan sa mga biktima sa linog ang mga eskwelahan sa katarongan nga temporaryo lang ang pagsakripisyo sa mga estudyante mientras padayon pa ang mga aftershocks ug wala pa nila matukod pag-usab ang ilang mga panimalay.
RadyoMaN Joel Viray
