Davao City – Usa lamang ka misunderstanding sumala pa ang nahitabo tali kang Davao City Mayor Sara Duterte-Carpio ug sa Alliance of Concerned Teachers (ACT) Davao Chapter.
Sa interbyu kang First District Councilor Pilar Braga, gibutyag niini nga human sa pagpost sa usa ka social media account sa alkalde ug gitawag nga gilangkuban sa mga terorista ang maong partylist, dali niining gitawag ang ilang atensyon.
Gitataw ni Braga nga na-‘misquote’ lang matud pa ang mga magtutudlo.
“Gipangutana nako sila kung tinuod ba to ilang gisulti, ang ilang tubag sa nga gi-site lang nila ang ubang ginahatag sa ubang cities,” segun niini.
Giangkon sa chairperson sa Committee of Education, Science and Technology, Arts and Culture nga nalain kini human sa iyang nadunggan.
“Davao City, eversince, especially under the administration of Mayor Inday Sara Duterte, nagahatag gyod na og pahalipay, siguro once a year pero naa gyod especially December, dili lang pod sa teachers pero para sa tanan,” pamahayag sa konsehal.
Gani gibatbat niini, nga kinahanglan klarohon sa mga magtutudlo ang maong isyu ug kung mamahimo personal nga mangayo og pasaylo sa mayor sa Davao.
Sa pikas bahin suportado ni Second District Councilor Danilo Dayanghirang ang pamahayag sa mayor ug gipanghimakak ang mga akusasyon sa ACT-Davao.
Sa iyang privilege speech, gibutyag niini nga kinahanglan paubsan ang ekspektasyon sa mga magtutudlo gumikan taas lamang kini.
Sumala pa muabot sa kapin P406-M ang hangyo nga mga subsidiya sa mga magtutudlo diin P287-M matag tuig alang sa ilang monthly allowance ug P119-M matag tuig sa ilang quarterly rice subsidy.
Dugang ni Dayanghirang nga ginagahinan og pondo sa lokal nga panggamhanan ang suga sa mga poste, Lingap alang sa mga nanginahanglan ug honorarium alang sa mga police auxiliaries.
“We have to allocate the budget properly,” segun niini.
Gani gibakwi ni Dayanghirang gikan sa second reading agenda ang maong hisgutanan aron subling tukion sulod sa iyang gipangulohang komitiba nga finance, ways and means.
RadyoMaN Jason Amisola
