Sa interview sa RMN Malaybalay ngadto kang Engr. John Paul Yu, sa IPO-Philippines Cagayan De Oro City Extension Office, gibutyag niya nga ang mga brands, trademarks, inventions, libro, kanta, ug uban pa nga orihinal nga ginama sa usa ka indibidwal o mapa negosyo man ang mamahimong iparehistro sa buhatan.
Kini aron sumala pa maproteksyonan ang katungod sa paggamit niini ug walay si kinsa man ang makagamit nga walay pagtugot sa tag-iya sa partikular nga intellectual property.
Dugang pa niya nga abli sa tanan ang pagparehistro niini ug kinahanglan lang makigkoordinar sa opisina.
Gipasabot usab ni Engr. Yu ang sitwasyon ilabi na og adunay nag-awat, o naggamit sa partikular nga brand o trademark nga iya sa partikular nga indibidwal o negosyo apan wala narehistro sa IPO.
Sumala niya nga gikinahanglan gayud ang pagparehistro niini ayha makaduso og reklamo tungod kay mao man kini ang mahimong basihan nga gipanag-iyahan ang partikular nga brand o trademark.
Dili matud pa basta-basta maka-enforce sa balaod ang buhatan ilabi na og wala narehistro ang maong brand.
Maong giaghat niya nga magparehistro sa usa ka intellectual property aron nga adunay igong proteksyon kung panahon nga gamiton kini nga walay pagtugot sa owner o tag-iya niini.
