TACLOBAN CITY – Gin-anunsyo na han Department Of Health (DOH) yana nga adlaw huwebes, February 7 an measles outbreak ha Sinirangan Bisayas.
Umapela hi Health Secretary Francisco Duque III ha publiko nga ipabakuna na an ira mga anak kontra tipdas.
“The department of health is raising once again today the red flag for measles in other region of Luzon, Central and Eastern Visayas.”
Ginhimo an anunsyo han DOH para “mas pakurukusgon an surveillance han mga bag-o nga kaso ngan magin alerto an mga kag-anak.”
Sumala kan DOH Regional Information Officer John Paul Roca, nagtitikahitaas an kaso han tipdas ha Region 8, umabot na ha 160 an kaso ngan walo na an namatay.
Ha datos han DOH Regional Office 8 tinikangan ha January 1 to February 1 yana nga tuig, nahipatik an pinakadamo nga kaso han tipdas ha probinsya han Leyte kun diin mayada 119 cases, ginsundan han Samar nga mayada 33 cases, Eastern Samar 3 cases, 2 cases naman ha Biliran ngan Northern Samar, ngan 1 case naman ha Southern Leyte.
Upat (4) an namatay ha Palo, Leyte, duha (2) ha Tacloban City, usa (1) naman ha Gandara, Samar ngan Pastrana, Leyte.
An measles o tipdas in usa nga respiratory desease, tungod han virus, pwede ini matransfer person-to-person pinaagi han paghatsing, ubo, ngan close personal contact. An mga sintomas hini amu an pag-ubo, sip-on, mapula nga mata, ngan skin rashes.
