BREAKING NEWS: Mga opisyal han PNP ha Northern Samar ngan Regional Director, gintanggal ha pwesto

2717

TACLOBAN CITY – Gintanggal ha pwesto ni Philippine National Police (PNP) Chief Director General Oscar Albayalde an tulo nga opisyal han Northern Samar Police pati na an ngatanan nga pulis Han Lapinig Municipal Police Station han mao nga probinsya.

Ini an gin-anunsyo ni PNP Spokesperson Benigno Durana.

Ini nga order ni Albayalde in may paghisumpay han nahinabo nga pag-atake han sobra syen nga gin-aaligar New People’s Army (NPA) ha Lapinig Municipal Police Station kanina han kaagahon.

Gintanggal ha pwesto ni Albayalde an commander han 2nd Northern Samar Provincial Mobile Force Company nga hi Chief Inspector Juan Byron Leogo ngan hi Northern Samar PNP Provincial Director Senior Supt. Romeo Campomanes.

Ginpatanggal gihapon ha pwesto han PNP Oversight Committee hi PNP Region 8 Director Chief Supt. Mariel Magaway, samtang nagdudumara pa hin imbistigasyon an PNP.

Pati na gihap an Chief Of Police han Lapinig Municipal Police Station nga hi Police Inspector Noli Montebon.

Duha nga pulis an samaran ha pag-atake han mga rebelde.

Sumala han PNP, upod ha mga butang nga nawawara ngan posible nga ginkuha han mga NPA an mga armas, kwarta nga nagkakantidad P70,000.00, mga cellphone ngan laptops tikang ha mao nga police station.

Facebook Comments