TACLOBAN CITY – Igin-isa na han Office of the Civil Defense (OCD) Region 8 an Red Alert Status ha bug-os nga Sinirangan Bisayas tungod han magigin epekto han Bagyong Samuel.
Ha interview han RMN kan Rayden Cabrigas, Information Officer han OCD Region 8, gin-aabisuhan na an mga nangungukoy harani ha kabukiran ngan kabaybayunan nga mag-ikmat ngan mag-evacuate na para diri magbasul ha kaurhian.
“Red alert warning status na kita so heavy rain downpour talaga it expected, so ha mga mountainous areas gihap an mga prone to landslide and flooding as well as an harani ha kadagatan kun pwede mag-ikmat na kita ngan kun mag-evacuate pag-evacuate na.”
“Gin-aabisuhan na liwat naton an mga coastal barangays specially an aton manaragat nga kun pwede diri na kita magpalawod kay delikado na po.”
Sumala naman han City Disaster Risk Reduction and Management Office (CDRRMO) ha Tacloban, kinahanglan na mag-evacuate an mga aada ha landslide prone areas sugad han Apitong, Nulatula, Abucay, Diit, Tigbao, Palanog Area, Tagpuro, Suhi, Sto. Nino, ngan Cabalawan.
Ginkakabarak-an nga niyan nga gab-i magtitikang an mga makusog nga pag-uran tungod nga early evening maglalandfall an bagyo ha Dinagat-Samar-Leyte, basi hiton weather report tikang ha PAGASA.
Sumala kan Brando Bernadas, Head han CDRRMO, nag-order na hira hin pre-emptive evacuation ngadto ha mga coastal areas barangays ngan harani hiton hulga han landslide.
“An aton mga kapitan aton na ini gin-coordinate, magpapatuman kita hin pre-emptive [evacuation] an ira makikit-an nga dapat gud ig-evecaute in igpapa-evacuate dayon naton.”
Nakabantay na an CDRRMO pati na an mga ahensya han gobyerno para hiton epekto han bagyong Samuel nga maglalandfall niyan nga gab-i.
