General Santos City–Maisugong gipamahayag karon sa labaw sa Philippine Drugs Enforcement 12 kon ni PDEA 12 Regional Director Gil Castro nga dili kini magduha duha sa pagpasaka og kaso batok kang Lumasal Barangay Kagawad Jamalul og obstruction of Justice.
Gikasuko karon ni PDEA 12 Director Castro ang pagbaliktad og pausab usab nga mga pamahayag sa Barangay Kagawad sa nahitabong drug raid sa panimalay ni Maasim Mayor Jojo Lopez kaniadtong milabayng semana. Kahinumduman nga una ng gipamahayag ni Kagwad Jamalul ngadto sa PDEA 12 nga ang duha ka mga armas nga nakuha sa drug raid ang panag-iya ni Mayor Lopez apan karon gibakwi sa Barangay Kagawad og giingong iyaha na ang mga armas nga nakuha.
Daku matud pa ang pagtuo ni Castro nga gusto lamang libugon ni Kagawad Jamalul ang imbestigasyon nga ginahimo sa kapulisan og PDEA pinaagi sa pausab usab nga mga pamahayag. Banat pa ni PDEA 12 Director Gil Castro ngadto kang Jamalul nga magpakita kini sa publiko og di ki magtagu tagu kung tinuod ang mga pamahayag niini sa Media.
Normal lamang sa mga kabanay sa naprisong Mayor nga modepensa og ipanghimakak ang tanang mga akusasyon kang Mayor Lopez ingon man ang pag deny sa pamilyang Lopez sa mga nakuhang kontrabandos sama sa 1 kilo sa shabu nga mukabat sa 5 million pesos, ecstasy tablets, mga bala og armas nga matud pa planted ang tanang mga nakuha sa panimalay sa Mayor.
Sa Korte na lamang ipamatuod sa pamilyang Lopez ang ilahang mga banat sa PDEA 12 tungod andam matud pang depensahan ni Castro ang iyahang mga ginsakpan sa nahitabong operasyon. (Emir Bariquit)
