![PATAY-QUEZON.jpg](https://i0.wp.com/rmn.ph/wp-content/uploads/2020/03/PATAY-QUEZON.jpg?resize=696%2C495&ssl=1)
Gipusil patay ang usa ka Barangay Kagawad sa Minsarilac, Quezon, Bukidnon, alas 8 kapin kagabie.
Sa interview sa RMN DXMB Malaybalay ngadto kang Police Major Mitchel Clemencio, ang hepe sa Quezon Municipal Police Station, gi-ila niini ang biktima nga si Renato Etulle, 51 anyos, nagpuyo sa Purok 1 ug barangay kagawad sa mao nga barangay.
Matud niya nga nakadawat sila ug taho kalabot sa mao nga pagpamusil alas 8:35 kagabie.
Sigun ni Major Clemencio nga nagtindog ang biktima sa sulod sa ilang kusina ug didto kini gipusil kung asa gipalusot sa suspek ang pusil sa bintana.
Narekober sa crime scene ang 8 ka basiyo sa bala ug usa ka buhi nga bala sa .45 nga pistola.
Gidugang sa hepe nga on the spot nga namatay ang biktima tungod sa kadaghan sa igo niini sa iyang kalawasan.
Padayon karon ang gihimong imbestigayon sa Quezon MPS sa mao nga krimen.