ILOILO CITY – Ginmando sang Office of the Ombudsman ang pagkakas sa pwesto kay Punong Barangay Nicolas Hermano sang Brgy. Buntatala sa distrito sang Jaro.
Bangud sini ginpatuman ni Iloilo City Department of Interior and Local Government Director Atty. Ferdinand Panes ang mando sang Ombudsman sadtong Hulyo 14.
. Suno kay Panes nag-ugat ang kaso sa reklamo ni Barangay Kagawad Melliza Flores bangud sang mga wala naliquidate nga mga disbursements sang Tesorera sang barangay.
Gindugang pa ni Panes nga nagsugod ang disbursements nga indi ma-account sadtong tuig 2013 kag 2014. Naglambot sa masobra sa P2 million ang narelease nga tseke. Sa amo nga kantidad halos P800,000 lamang ang na-account sang barangay.
Ginpasakaan man sang kaso ni Hermano sa City Prosecutor’s Office ang iya tesorero sang kaso criminal apang ginbasura ini sang korte.
Ginkumpermar man ni Panes nga nag-appeal ang kampo ni Hermano apang kinahanglan nila nga ipatuman ang dismissal samtang nagapadayun ang appeal.
Kaupod sang dismissal sa posisyon, indi naman makapangalagad sa gobyerno si Hermano kag ginapa forfeit ang iya mga benipisyo kun may ara.
